Saturday, June 20, 2009

Ka thianpa nen kan insual a

Thangkhat lian zet chu a ni ve ta. Chhanglaikua pakhat hlawha nilenga thirchhia zawng peih, nu leh pate thu aia boss te thu awih hunlai a ni a. Kawngah savun kawnghren a samurai lem mau a siam leh hmanrua chi hrang hrang kan pai tawh chuan hlauh kan nei tawh lo a ni tih kan hmelah a lan chian em em hunlai kha a ni.

He ka thianpa hi kan tetlai atanga in kawm tawh kan ni a, kal pawh la kal theih hma atanga papawr inchuha nu leh pa ten min invah chak siak tir thin. Kan inrual bawk si a, kan inkawm nasa bawk a, mi te pawhin unau emaw min ti chawk. Insual buai ta ngai miah lo bawk chu, mi sual rawn leh tihbuai ah erawh kan in tawiawm tha thei hle.

Inrinni vawikhat chu kan thiante ho nena kawtzawla kan infiam laih laih laiin kan u te ho an rawn kal a. "Insual rawh u, in in tiat ropui sia, a chak zawk zawk chu ka kid number one a ni ang" tiin kan boss chuan a rawn sawi a. Kid number one nih kha chu nuam thei tehmai ania, kei kha ka ni deuh char char a. Kid dangte aiin engkimah kan lal zawk a, tawlailir khalh tur awm se, midangin minute 5 an khalh theih laiin kei chuan minute 10 ka khalh thei thin.

Chutia kid number one tur zawk insual a thlan an tum lai chuan keini pahnih chu chirhdiak ah milem siama kan thut mai mai lai a ni a. Kan mak ti leh, insual ngai lo bawk nen, kan inmelh ringawt a, kan lai dun hle. "In insual ngam nange? In va dawih ve" tih ringawt chu a rawn ri a, a chang leh "In insual loh chuan kan pawl atangin in bang ang" tih vel te chu a ri nawk bawk a. Ni e, kan pawl leh pawl lehlam kha kan awm a, kan indo nitin ziah reng bawk a. Pawl lehlam mi leh sa kan hmuh chuan han 'shock' deuh zauh loh chuan kan inchhuah ngai bawk hek lo.

Chutia pawl atanga ban meuh an sawi rik takah chuan kan ding dun ta a. In khawih hmasa zawk nih kan hreh ve ve hle a, kan inmelh reng ringawt. Kan indinchilh rei ta a ni ang, midang pawh chuan min en thap mai a. Kan u te ho zinga pakhat chu a rawn kal a, ka kut rawn la in, ka thianpa chu a han deh tir zauh a. Kan tan chu a ni ta der mai. Ani chuan a kut in na lo te in mi rawn dek ve leh zauh a, tichuan kei pawh chuan a aia na leh hretin ka han dek leh zauh a. A na chho tial tial.

A tawp a tawpah chuan kan inkuah ta. Kan insual chu a ni ta der mai a, thiandun inhaw chuang si lo a, insual chu a lo ho ngei mai. In hnek nat kan hlau ve ve a, na vak si lo in, kan in bawhbet let kual ta vel mai mai a. Insual e tilo chuan kan in nuih leh sak sak thin a, mahse a bet zawk nih chu kan duhlo ve ve. "A hnarah khan thingpui sen luanchhuah tir ta che", "A biangah khan 'lawk' rawh", "A ban kha khirh bet tlat rawh" ti te chuan min lo fuihpawrh nasa ngang mai.

Kan han ti tak na thin a, inhnehtawk phian bawk si a, a tu amah mah chu che tha zawk kan awm thei lo. Chutia, engvakmah ti si lo a, insual ta reng chu en pawh min en tha peih ta lo a. Min kalbo san ta hlawm a. Keini lah chu ti ve tawh laklawh si a, chawlh mai lah chu kan duh tawh bik lo. Kan inkuah reng a, kan inbawhpelh leh phat phat thin.

Nakin deuhah chuan chhun thingpui in hun a rawn ni a. Chhungten min rawn au ta vak vak a, chutia min rawn auh chuan. "Hawh, thingpui in chawl phawt ila, kan insual tha leh dawn nia" tiin ka han hrilh a. Ani chuan engtin mah chhang chuang lem lo in mi rawn kuah beh na chu a phelh ve mai bawk a. Kan bal dun hle. Thingpui in tura kan haw chu chhungten min lo hau nasa kher mai, "In van tal bal em em ve, thingpui in zawh veleh ka bual ang che" tih thu chuan min deng zui nghal a. Mahse thingpui in zawh veleh insual chhunzawm leh tur anih avangin engtinmah chhang lovin thingpui chu kan in ve nghal a.



Thingpui in zawh chuan a rang rangin, chhungten min koh hman hma in kan tlanchhuak leh a. Kan insual leh tan ta. Tunah chuan kan insualna pawh kan sawn deuh dawn a ni. Inbual tur tho tho tiin, a chirh diak tha laiah chuan kan insual ta a. A nuam ngang mai. Mi te pawhin min rawn kal pel zauh zauh a, mahse tumahin thelh enah pawh min en lo, kan diak tha piat piat tawh lutuk.

Kan boss ten kan pawl buk te a kungfu min zirtir te kha ka hrechhuak a. Mahse, kungfu min zirtir ho kha han hman tangkai ngaihna vak a awm lem lo. Nakinah chuan kan insual rei leh ta deuh a, kan chau leh tawh ngang mai. "Hahchawl lawk ang" tiin kan han thochhuak leh rih a. Inhnek na ngamlo ve ve chu, chauh bak loh chu han na em em kan nei lo. Kan insualna bul lawkah hian kawng thlang lampang panthlakna sitep tui zet mai, a sira tuiluankawr inphah thla zai zai hi a awm a, chulai hmun chu kan tih hlawm khawp mai. Kan veng naupang hi lum lo an awm pawh ka hre lo e a.

Minute 5 vel kan chawlh hnu chuan kan tan leh ta. Kan let kual deuh phat phat thin a, chutia kan leh kan leh takah chuan sitep thui lampang chu kan hnaih hret hret zel hi a lo ni a. Thil dang ngaihtuah vak tawh lo, a bet zawk nih hreh ve ve si chuan kan tawlhna lampang chu kan lo hre tawh lo re re a. Ni a sa bawk si a, a bet zawk nih chu a hrehawm reng a ni. Ni kan en siah mai a, men pawh a men theih loh.

Nakin deuhah chuan eng kan ti nge pawh kan hre ta lo, kan lum ta bawp bawp mai. Kan tih em em thin, a zawna kal pawha a hlat deuh thei ang bera kan kal pelh hram hram thin sitepah chuan kan lum a ni tih kan hriatchhuah meuh chuan a sir kawrah kan lum lut tawh. He sitep ah hian cycle in vawi khat ka tlan liam tawh a, ka nau ka la phur zui. A hnuah ka nau phei chu a lum nawn nual nghe nghe a, ka sitep hlauh ber a ni ang chu. Chutia tuiluankawra kan lum lut chu rem em em mai hian kan inhnawh ta chat mai.

Inhmatawn ve ve in kawrah chuan kan inzep tat a, a tu amah mah kan chesawn thei lo. Chhuah tumin theihtawpin kan han bei nawn ngial thin, kan tanna kha a rem em a, tih theih kan nei lo. Ka hnungzanga lung pawngin min kam tlat chuan tan a ti harsa hle bawk a, a hmaa lo insual zawi tawh nen, a tan theih loh ngei mai. Ka thianpa tanchhan chuan theih hrama chhuah dan ka han ngaihtuah a, a ke te chu tanchhanah hmangin ka han tlawh vak vak thin a, a theih loh. Ani pawhin a han bei ngial a, kan beidawng dun hle.

A tawp a tawpah chuan tih theih dang kan nei tawh lo, tah mai loh chu. Kan tap dun ta vak vak a, minute 5 vel lai chu kan tap hman ang tihin, a piah lawka meitei puanthui ho chu an rawn tlan a, engtin tin emaw min rawn chhanchhuak ta a. Kan inah ve ve min pawm haw zui, kan tan chuan samari mi tha an va ni tak em!!!

Chau bawk si, thi dawn tawh hiala kan inngaih hnu a min rawn chhanchhuak ta si te, kan tap nasa bawk si te chu chhungte chuan min lo lainatin min lo duat hliah hliah ang tih nak alaiin, a tirah thil chinchang min zawt a, a hnu ah erawh min tih dan a duhawm loh hle. Ni e, kan bal bawk si, rimchhe tawh bawk si kha, na tawka innawh a, inbual bak hmabak kan nei ta lo. Chuta karah kawra kan tan nachhan pawh nu leh paten an duhloh ber insual vang a la ni zui. Hmabak chu a thim tiah tiah e. Khami ni a, ka nu in min nawh kha a na ka la tih pawl chu a ni ta ve ang.

Kan thianpa pakhatin mihring luruh kan chhar (a hnuah doctor zirlai ta a ni tih kan hriatchhuah leh), a luruh chhunga a kut zenluta a ken kual vel, a nu in a lo hmu. A ten lutuk nileng deuh thaw a a kut a nawh a, mittui tla lek leka kan lo nuihsawh vel lai ka ngaihtuah lehin tuna ka dinhmun nen hian inang riau in ka hria a. Ka thianpa tap nasa lutuk te kha ka hrethiam ta kuar kuar mai.

Ni e, khami tuma kan insual kha chu theihnghilh a har ve ta viau ang. Ka thianpa lah chu kan inkawm loh na a rei ta hle mai, kum sawm dawn lai chu kan inkawm ta lo. Tuina leh thian kawm duhzawng a inang ta lo nge ni ang, inhmuh changa inbiak zauh zauh bak kan inkawm ngai ta meuh lo. Tin, he thu hi thu tak tak zinga dawt tlem belh a ni. "Thih sak pawh ka ngam" lehkhabu ka chhiar atanga naupan lai (ti ve khanglang ila) chanchin ka ngaihtuah chhuah atanga ka rawn phawrhchhuah a ni e.

Wednesday, June 10, 2009

Luangliam

Hla tak atanga ka rimawi hriat chu ngaihthlak chian tumin ka pan phei deuh hret hret a. Chumi zan chu zan dang ang lo tak maiin thli te chu a thaw heuh heuh a, boruak pawh a nuam angreng hle. Rimawi hriat avanga chutia mi pakhat tawlh hrut hrut chu mimawl emaw tih mai a awl ngei ang.


Mahse, chu rimawi chu rimawi dangdai tak mai, high school atang tawha ka hla duh em em mai Dream Theater hla “Through her eyes” kha a ni tlat. A hla chu a lo tawp dawn tawh a, ka thlen phei meuh chuan a tawp titih der mai. Hrilh hai tak maia ka awm reng lai chuan, thutna remchang deuh mai hi a lo awm hlauh a, tuma hrilh ngai lovin ka taksa chau tak mai chu ka han thu hahchawl a. Chutah le, rimawi dangdai tak mai kha a rawn ri leh tlat mai. Chuta thu pah chuan lungdam em em mai hian ka ngaithla ta a, suangtuahna khawvelah bawk chuan ka tlulut leh ta.


He hla hi ka thianpa pakhat MS-a’n pawl sawm kan zir laiin ngaithla ve rawh min ti a, chumi tlai sikul ban chuan ka ngaithla ta alawm mawle. Ruah a sur deuh ser ser a, sikul uniform ka thlak zawh veleh atang ka ngaithla char char a, a zawh veleh ka play nawn leh a, ka ngaithla nawn ta tluk tluk mai a. A thu chu keini ang saptawng thiam lo tan chuan hriat kim sen a ni lova, internet lamah a hla thu lak tur chu zawn ka tum a. Mahse, khaw chhiat deuh avangin server a down a, internet a khawih theih si loh. Chutichuan, ka thiam dan dan leh ka hriat dan dan chuan a hla thu chu ka ziak chhuak vel ta mai mai a. Chutih lai chuan ka play nawn reng bawk a. A hla thu nena inmil tur hian suangtuahna mitthlaah chuan lem ka chantir zel a. Tukverh kan dak chhuak a, ruah sur ban khaw thiang kuk mai ka hmuh chuan ka lung hi a leng vawng vawng mai a. Chutia suangtuahna khawvela ka chen lai chuan chaw ei a lo hun leh ta der mai a.


Chaw ei kham atang chuan a ngai te bawkin computer hmaah chuan ka thu leh ta a. Khua chu a thim tawh. Thla pawh a rawn eng nalh khawp mai. Zanin chu lehkha pawh ka zir lo mai ang. Ka hla thu ziah chhuah chu ka en nawn a, ka ngaithla a, ka suangtuah a, engdang mah ka ngaihtuah hman lo. A remchan veleh a a hla thu diktak lak chu ka nghahhlelh ber pakhat a ni a, tin, chumai bakah thianpa MS-a hnena ka ngaihthlak dan chanchin chu hrilh ka nghakhlel tawh hle. Hetia hla pakhat chauh ngaithla a, zan khaw tairek thleng thlenga ka men hi chhiar tham fe a ni tawh.


Eagles ho concert na video “Hell freezes over” phei kha chu pawl riat ka zirlai atang tawh khan zan tin deuh thaw hi ka en tluk tluk mai thin a, ka ngaithla zing deuh bawk aniang, ka nau te tereuhte te pawhin dik leh dik loin an lo zawm ve theifur mai. He video phei hi chu ka roh a, tun thlengin ka la dahtha khiau.


Guitar nena verandah a thut chhuah ka ching bawk a. Ka hla sak thinte lah, hla hlu leh hlui deuh hlir an ni thin a. Guitar nena pawna ka chhuah tawh chuan, “A lung a leng leh tawh a ni maw” tih zawng chu ka tawngkam dawn thin a ni. Zan khat chu kan kawmthlangpa lungleng hian phenglawng hian hla chi hrang hrang a tum alawm mawle. Dar 9 vel atang a tum tan a, a ri lah mutna atanga ngaihthlak nuam tawk chauh a ni a, mutthilhsan phal mai chi a ni lo, a ri hlerh hlerh a, pawna va chhuah ve mai tak kha ka nap a. Kut thing meuha zuk chibai kha ka chak khawp mai.


Hmanah class room chhunga class kan lak laiin ruah a sur deuh cherh cherh mai a. Sikul thlang deuh atang chuan kan hriat ruai ruai phak tawk lek hian The Last Resort kha an rawn play pek alawm mawle. Class lak pawh a ngaihtuah theih loh, tukverh lam chu ka en a, chhum zing deuh chuai kara, tlang hring deuh thup ka hmuh te zawng chu ka lung ti leng em em tu chu an ni.


Thian ngaina mi tak mai ka ni a. Mi tupawh hi thiana siam vek hi ka duhdan a ni a, mahse thianpa ka ngai thei lutuk erawh hi chu hrehawm ka ti thin. Thiante nena hlim tak maia awm ho tluk hi chu a awm lo, mahse hmasawnna a awm si lo. Engpawhnise, khawvela kan awm chhung zawng hi chuan LUNGLEN hi a awm ve reng dawn….We’ll meet again tih Ross Parker and Hughie Charles te phuah hian in thlah leh poh mai ang aw….

We’ll meet again, don’t know where, don’t know when
But I’m sure we’ll meet again some sunny day
Keep smiling through, just the way you used to do
Till the blue skies chase the dark clouds far away


Now, won’t you please say “Hello” to the folks that I know
Tell ‘em it won’t be long
’cause they’d be happy to know that when you saw me go
I was singing this song


We’ll meet again, don’t know where, don’t know when
But I’m sure we’ll meet again some sunny day

Yes, we’ll meet again. Darlin’, I don’t know where and I don’t know when. But
I KNOW we’ll meet again one of these good ole sunshiny days. Ya know, darlin’, all ya gotta
do is just keep on smilin’ through you know just like you ALWAYS do, until the blue skies
chase the dark clouds far, far, far away. I wantcha to do me a favor, please say “Hello” to all
the folks that I know. Well, just tell ‘em it won’t be long. They’d be happy to know that when
you saw me go, I was standin’ right here, singin’ this song.


We’ll meet again, don’t know where, don’t know when
But I know we’ll meet again some sunny day


(May 18, 2007 a ka ziah tawh a ni a, ka rawn thurchhuak mai mai. Thu hlui rawn khawrh thar zeuh zeuh ka rawn ching mai thei a ni.)

Wednesday, June 3, 2009

Nun khawhar

Ruah chu a sur ve deuh seng seng a, hetiang khaw luma ruah a rawn sur tawh hi chuan a hlimawmin, van boruak en chhoh pahin ruah si kan in nan tir sep sep thin. Zan dang ang bawkin khami zan kha balcony ah ka va dakchhuak leh a, ka ding reng a. Khawvelah hian ka pa ber a ni ti thin tan pawh hetiang ang ni khuaah hi chuan lunglen loh a har thin khawp mai. Sana ka'n en chuan a lo tlai deuh tawh avangin mut zai ka rel ta a, ruah lah chu a sur duh zek.

Kawl rawn phe zawr zawr chuan ka khum bul tukverh chu a rawn chhun eng zawk zawk a. Ka mut lah chu a chhuak thei der lo, ruah in mi rawn theh ka hlauh avangin tukverh chu ka khar a ni. Mahse, chutia ka mut theih bawk si loh chuan, tukverh lehlam chu ka han hawng a, zan danga ka tih ngailoh tak maiin phone ah chuan hla ka ngaithla ta riai riai a.

Ngaihtuahna ding tak nena Bob Dylan hla "Trying to get to heaven" ka ngaihthlak lai chuan, tukverh biangah chuan parva a rawn fu a. Chutia khaw lum takin hun rei tak min hrem tawh hnu a, van malsawmna dawnga ruah tui dai tha tak mai a rawn sur chu nuam a ti in, a lo chen ve ni ngei tur a ni, a zawrin a zawr hnep mai. Kawl rawn phe zawk zawkah chuan a rawn lang chiang leh zauh zauh thin.

Chiang deuh zawka en tumin ka han thu chhuak a, a piah lawkah chuan a thiante chu an nupa te te in an lo mu hlawm a ni tih ka va hmuh chuan chu sava chu ka khawngaih leh zual ta viau mai . Chutiang taka riang chu, tih theih nei ila, hlim takin a duh tak nen chu ruah sur te pawh chu an do za tur hi a ni a. Mahse tih theih ka nei si lo. Chutiang awmpui tur a neih loh avang chuan amah ang thova khawhar ve tukverh bulah a rawn fu ni te hian ka hriat tak chu.

Tih theih ka'n nei chuang bawk si lo tiin ka mu lut leh a. Khawhar hi enge a nih chiah pawh hre lo mah ila, ka khua hi ka ti harin, ka lung te hi ka ti leng ve leh vak ringawt zel. Hetiang lama ka ralkhat ngaihsan, Fam James Lian Mawia ka hrechhuak zawk a. A chanchin chi hrang hrang ka lo hriat ve te atanga ka mi ngaihsan a ni.

A la tha viau emaw tih laiin chanchinbu lamah a boral a ni tih ka hmuh chuan ka lo ui ve em em ringawt mai a ni. A lehkhabu lehlin leh a lehkhabu ziah ka la chhiar lem lo, mahse a article pakhat a thianpa Fam JF Laldailova tana a ziah, "My Last Tribute to JF Laldailova" tih kha ka chhiar tawh a, ka chhiar ngun thin hle. A ziahna chanchinbu copy te kha ka dah tha reng thin a, engtin tin nge a bo tak pawh ka hre tawh lo.

A saptawng thiam zia leh thu leh hla lama a ril zia te hi mi ka atangin ka hre nasa tawh a, a takah pawh vawi 2 vel chu ka hmu ve tawh. Ka tet deuh lai a ni a, mahse ka pa in min chibai tir tawh tlat a ni. Pa te lam deuh, ngo lampang, kal khun kheu kheu chi kha a ni reuh a. Tunah chuan ani pawh khawhar tawh lovin a chawl tawh ang chu.

Ni e, vawiin June ni 3 a lo thlen hian ka khua a har a ni. Nizan lamah te pawh nikum lama ka awmdan zawng zawng thil te ka ngaihtuah nen hian ka mak tih a la reh lo a, awih har ka la ti cheu. Ka pa boral champha vawi khat na a lo ni ve ta reng a ni tih te chu rin thiam har ka ti a, hun te hi a va lo kal chak tak em.

Khami zana ka bula awm ka thianpa kha Mizoram lamah a haw lai a ni a, nizan khan min rawn be hlauh mai a. "Thianpa, hei zanin chu ka lung a leng khawp mai. Nikum tun ang hunah khan kan pahnih a kan awm lai khan kha thil kha a rawn thleng a" tiin ka han hrilh a, ani pawh chuan "E khai, a ni tak maw? Hun hi a va lo kal chak ve," a tih hnu chuan min biak chhunzawm a chak vak tawh lo nge, kan in mangtha zui chu a ni mai.

Ni e, ka thiante pawh ka zah thin khawp mai. Nikum krismas Ni a, hlim taka awm ka tum vei nen. Ka rilru ah trek in a rawn deng ang zawk hian, "Pa nei lo te pa a piang ta, hlim takin Krismas hmang ang che" tih thu ka dawn atang chuan ka awm mai mai thei tawh lo. Ka tap nileng a ni deuh tawp mai, Krismas khawhar tak chu a ni ngei mai. Ka thiante min rawn biak tum pawh, mumal pawhin ka lo be thei lo.

Hun in min hnem tih te chu tih mai mai a ni, a rei tulh tulh a, kan lung a leng tial tial emaw tih mai tur a ni. Theihnghilh a har a, rilru ah a riak reng a, min chhuahsan ni reng a neih theih pawh ka ring lo e. Ka nunkhua hi a nghawng tak meuh meuh a, ka thiante nuih ruala nuih a har ka ti tawh a, ka thusawi duhzawng te pawh ka bula awm te tan chuan thil ninawm a tling leh thuai thin. Inthup ka tumin, thil engmah ngaihtuah loh ka tum thin vei nen, a theih loh a ni. Ti te chuan, thiante ka hloh tial tial mai dawn asin le!

Pa, I miss you........