Wednesday, March 28, 2012

Mutchhuak Thuchhuak

Laikhum belin zan mu ka chhing ta’ng e

Silh puan nem te u
In pu hi ka hah avangin min lo tuam r’u aw
Lukham dup tak te u
In lumna pe chhuakin duat takin min lo pawm r’u aw

Aw thosilen duhawm tak te
Ka harh loh nan sehmi lakah min lo hum la
Eng no nalh tak te
Mut ti nuam tawk chiahin i en na pe chhuak la

Zawhte nunnem tak te u
Zahngaiin inngeih takin awm dial dial ula
Aurinna pawimawh tak te u
Khawngaihin zanin chu lo phur lutuk lo ula

Cellphone taima tak te
A pawimawh loh chuan min hrilh lo la
Alarm harhvang tak te
Mut ka kham hma chuan min kaitho lo la

Earphone aw mawi tak te
I rimawi hmangin min awi mu leh rawh le
Ngaihtuahna kal kual chak tak te
Zan a ni tawh a hahchawl ve rawh le

Hlim takin kan inkawm leh dial dial dawn nia

Friday, March 16, 2012

Hriat Tirh Hriat Thelh

Sumo Tata Sumo motor hi chu kan hre vek awm e. 1998 kum vela Mary Mount School kan kal lai kha a ni ta in ka hria. Exam lai hi a ni a, Rindika (of Tlangnuam) nen school playground sira thutna ah chuan exam tan hma in lehkha kan zir a, kan thutna atang chuan kawngpui a lang thei a, Rindika chu kawngpui lam a hawi voh voh lai chuan phur tawk hian, “Aaahhh….khu Sumo. A tlan chak a sinnn!” a tih pah chuan en ve tum chuan ka hawi thla ve nghal a. Ui te pakhat mei kawh va a tlan chiam mai hi ka zuk hmu a, thil danglam tak ka lo beisei laia an venga ui pakhat tlan lai mai mai min hmuh chu tawng pawh tawng lovin ka hawi let leh a, lehkha chu ka zir chhunzawm leh ta a. An veng a ni bawk a, ui hming te pawh a hre vek anih dawn hi ka ti rilru a.

            Ani lah chuan Sumo motor chhuak thar TV lama fakna a lo hmuh thin kha a takin a hmu a, ka zuk en ve kha chuan a lo tlan liam tawh a ni maithei, bakah sumo a tih khan motor a ni ang tih ngaihna reng reng ka hre lo bawk a ni. Nupui a nei tawh bawk a, ka rawn sawichhuak mai mai anih hi. Rindik, hmana Sumo tiha min hrilh kha Ui te hming kha emaw ka lo ti char char a.

            He pa bawk hian min lo fuihpawrh hneh thin ngei mai. Tlangnuam Field a kan sports laiin haw ru turin min sawm a, kan haw ru. Kalkawngah chuan a ek a chhuak ta tlat mai a, mi in rel lai hi kan hmu a, “Hetah hian e dun ang,” a ti ta tlat mai a. Field lam chu ka zu en a, sikul naupang chu attendance pe turin kan lam hawi zawng chuan an intlar thup mai a, “Min hmu palh ang, a zahthlak,” ka tih pawh chu a lo ngaihsak tawh lo, a dropping centre chu a lo hawng der tawh a, chutia ka kalpui pa ber a ek tak tlat si avang chuan kei pawh chu……..

Sidney Sheldon – Hei hi chu keimah chauh ka nih bik ka ring lo. Hmeichhe thuziak thiam tak a nih hi ka ring char char a, High School kan kai chhoh hnu khan History Channel ka en uar laiin “Man of Letters” documentary ah chuan Sidney Sheldon chu mipa a ni tih ka hre ve chhaks! Ka lo ngaihzawn ruk vei roh nen! Tun thleng hian Sidney Sheldon hi mipa a ni tiha hrilh hriat tur hi ka la tawng zeuh zeuh.

Bekang Sa (Nutrela) – Chawhmeh tui tak mai Nutrela hi ka hriat tirh khan Alkatra tih tlatin zuk hre pek a! Kan vengah chuan Pu Zauva dawrah khan kan lei thin a, ani lah kha a fel thei em em khawp a, “Pu Zau, alkatra cheng sawm man,” ka tih chuan bo map lovin Nutela cheng sawm man min pe thlap zel.

Pen Drive – Vawikhat chu thianpa Chda hian thil pakhat tha deuh mai, computer USB port a vuah luh mai theih, hard disk anga thil dah theih ni bawk si hi a chhar hlauh mai a. Intithei lutukin a chhar tlai chuan kan thianho in kan inhmukhawm a, kan en laih laih a, 128MB lai chu space a nei ve a ni tih te kan hmu a. Computer a han vuah veleh khan Symtronics tih kha a drive hmingah a rawn lang thin a, Symtronics ti hlirin kan sawi thin. A hnu ah Symtronics chu computer dawr ah kan va zawng ve a, an lo neilo zel lehnghal! Kan awt ve hlawm ngei mai.

            Pendrive a ni tih kan hriat hnuah 1GB chu Rs. 2,000/- in neih zawng zawngin ka’n lei ve ta anih kha. Ka va lawm in a man kha a va lo to tak em! Opa lah chuan 1GB ka nei tih a hria a, 2GB chu Rs. 3,000/- in a pa a lo leitir ve bawk! A lo to ngei mai!

Mace – Thil sawi nana shortcut hman hian min tibuai fo tawh a. Vawikhat chu kan thiannu pakhat nen hian Yahoo Messenger ah kan inbia a. School kan chhuah hlim kha a ni deuh bawk a, enge a tih tum zel tak te ka zawh chuan, “medical lam cu k la tm rng a, tnah cuan azl ah k la om a, mace entrance te hi ka pe phot anga,” tih chu a rawn ziak a. “Anih tak chu,” ka lo ti laklawh tawh si a, MACE entrance chu eng entrance nge ni ang aw? tiin ka rilru a buai hle mai a. Medical lam anih avangin hriatthiam tumin ka han google chiam thin a, Mahatma Gandhi blah blah blah entrance tih vel te chu ka hmuh teuh ber te an ni mai a.

            Ka’n thiante dang medical lama lo kal tawh te chu ka zawt kual a, an lo bo angreng hlawm khawp mai a. A thla a thla tel fe ka buai hnuah amah nen chuan kan inbe leh ta hlauh mai a, hmana kan inbiak naa ka buai zia, MACE entrance chu enge tih vel chu ka zawt ta nge nge a. A thil type ang chiah chuan ka han type leh a… A nuih a za khawp mai a, “Mahse entrance te hi ka pe phawt anga…” a tihna a ni tih min hrilhfiah ta a. Mace tih a ziah zawhah hian entrance tih hian zui kher lo se chu ka hrethiam tho in ka ring a, entrance a rawn telh avang hian ka buai ta ber chu a ni e.



  • Hawi zau vak lo tih takah Lady Antebellum pawh an band hming a ni tih ka hre ngai hleinem! A zaitunu hi a ni ang chu ka lo ti ve ringawt a.

  • MTV Music Video Awards kan en tum hian, ka thiante nen Lady Mister tia a hming an lam nu chu chhelo kan ti hlawm khawp mai a. A hming te chu a va han mak reng reng kan ti a, kan play nawn sek a. A tawpah kan han google chiam a, kan hmuh tum chu kan hmu lo chiang ngei mai. Kan mualpho thui hma in engtin tin emaw Leighton Meester a ni tih kan hre chhuak ta hlauh zawk a!

  • Computer Monitor hi Motherboard tiin ka lo sawi char char thin a. Vawikhat ka nu hian Pu Zawna fapa ten computer thar an neih thu te a rawn sawi a, “Mama, enge a en na ber kha?” a ti a, kei lah chuan “Motherboard” tiin ka’n chhang deuh tlat a, ani lah chuan, “A ni lo, M atanga intan tho chu ania, mahse Motherboard chu a ni lo,” a ti a, “Awihawm loh, Motherboard alawm,” tiin ka chhang tlat sia, min ring zawk aniang, a awih ve mai a.

  • Computer pakhat atang hian email pakhat chauh a neih theih emaw ka ti thin!

  • Kan thianpa pawhin, “Leikapui tih hi Lunglei sawina tiraw?” tiin min zawt tawh.

  • Kan thiannu pakhat pawh hian lmao hi a awmzia a hre si lo a, mi a zawt ngam si lo a, tunlai style deuh aniang chu a tia, a mi biak apiang hnenah a thil type tawpah hian lmao tih hi a telh zel a. “I dam em? lmao”, “I van reh em em, induh ropui si..lmao” a ti ve chiam chiam a, kan hrilhfiah chiah chu, min sik hlawk hlawk mai.

Wednesday, March 7, 2012

Zei rapthlak dan – II


        Hello Zei people! In lo zei tawh hlawm viau lo maw? Rin ai takin zei hi kan lo mamawh hlawm a ni chek ang chu, a topic a hot laklawh tlat. A hmasa lamah hmanraw changkang deuh hmanga zei em em dan kan in hlui tawh a, tun tumah chuan khami nei remchang lo tana zei ve theih dan, in zawhna tam ber chu chhan in a lo awm dawn ta! A va han rapthlak lehzel ve le! Kumin zet chu, zei hlawm em em ila a ni ringawt mai. Ka thian mipa ho kha khawngaihin in hmeichhe perh thlak tum mek te kha Zeiness thuziak hi la chhiar ngai lo ni ngei sela a duhawm hle mai, chuti lo zawng i hawi lawl lawl mai ang.

        Heng thu ka ziah avang hian zei turah min lo dah ringawt ange, ka idea hi pakhat te pawh hi a awm ve ngai lo ania hehehe, ka thian duh tak te (an hming chu sawi lang lo leh phawt mai ang) experience leh titi atanga ka rawn lak khawm leh bawk a ni. Khawnge zei chu i han zir ho leh ang u hmiang!

PROJECT: How to be very “zei” a ni leh tawp – the cost effective way!

TARGET: Zei rapthlak dan part I hmang tangkai pha chin te perh thluk ang chu perh thluk ve ngei.

        DSLR Camera leh Android phone i neih loh avang khan lo beidawng suh, pawisa leh lirthei i nei lo anih pawhin mipa i ni tih inhria la, rawn hawichhuak la, hei hi chhiar rawh le. Khawvel hi a la tawp lo ania! Phone pangngai tal i nei alawm, a khai, kha computer pawh i hung ve reng alawm le. Khai mah aw! E, chumi hma in, Part I kha i chhiar loh chuan chhiar hmasa hram teh, i bo lutuk palh ange. Part I HETAH

HMANRAW NGAI TE:

1)   Thluak tha tak
2)   Internet khawih thiam
3)   Talent fahrah te te (thil eng eng emaw siam thiam)
4)   Thian tha tak (Part I ami ang tho kha - movie, hla, software etc etc nei thei tak, computer chhe siam thiam nghal)
5)   Tui chen thiam
6)   Guitar perh thiam
7)   Hmeichhe thian kawm ngeih em em mai, ngaihzawng nilo, mahse i bula awm deuh reng, i partner in crime.
8)   Rilru huaisen tak

STEP 1 – Hmeichhia i star zawng tak i hmu a

Khawlaiah – Kalkawnga i kal laiin emaw mi dawr kawta kuhva i ei sen suah suah laiin kan hmeltha-i chu i hmu ta a le, engtin nge i tih ang? I hre lo maw? I vanneihna hi ngaihtuah chiang teh! I thiannu i kawmngeih em em chu i bula a lo awm ve reng thin kha a hman tangkai hun a lo thleng chiah. “Eksek, teh, saw nu saw chhelo raps, please in a phone number min va dil sak,” i ti anga, Eksek-i pawh chu hmeichhia aia mipa bula tal nuam ti zawk leh tal tam zawk anih avangin a phur zawng tak a lo ni anga, mahse a zak deuh ang. “I ti zahthlak e aa…chi loh lutuk,” a ti anga, “Mawhh, vat vat, saw a kal liam hma in, va zawt la chuan i star number dil tura min tih hunah pawh ka ti ve ang, BFF kan nih kha?” i ti ang. “I tih ve loh vaih….ka hnek hrep ang che,” tih pahin a va dil mai ang. Hre reng rawh, hmeichhia leh hmeichhia an in dil chuan an in pe mai a, i va dil erawh chuan pek loh chu sawi loh, a lo ten em em zawk ang che.

Birthday party/Chaw ei khawm/Inneih lawmna etc – Hetiang nikhua ah hian a hma a kan sawi tawh ang hmanrua kha i neih loh avangin lungngai suh kan tih tawh kha, an buai buai in lo buai se, nang chuan e, guitar saw va chuh vat rawh le! I star pawh chu a awm hnai a ni tih hre bawk ang che. A tirah chuan perh ri vak vak lo la, nangma hriat tawk lekin i perh i perh tur a ni.

        Hetiang huau huau nikhua ah reng reng hian a second session ah chuan mi hi kan happy tlangpui tih hriat tur a ni a, chumi hun ah tak chuan a ni, guitar chu i lo perh rik raih raih dawn ni. A happy zual deuhin an rawn tih ngei ngei tur chu, “Perh ring la, zai ang uu,” an rawn ti deuh chhen anga, “Enge kan sak ang?” i ti anga, “Di Chambawihpui” an rawn tih chuan sak tawh loh tur, RV ah a hlathu hrechiang lova sak phal lohna notice an tar tlat. Chu aia hla lungkuai leh lunglenthlak zawk tak tak in sa anga, hmelthate-i te thianho pawh chuan an rawn zawm ve ngei ngei ang che u.

        Heng hlathu in sak lai te hian amah chu i en deuh anga, amah chu sak chhan ni awm takin i mitmeng pawh i ti easy tur a ni. “A sakhming pawh ka hriat loh khaa….thinlaiah ai ang a cham,” tih ah te, “Khawi lam lanu nge maw i nih le??..Tu hraileng chawi nge maw i nih le?..” tih ah te, a tam mai. Mitmeng hian thu tam tak a sawi thei tih i hriat kha, i mitmeng chuan i hnial lo tih a hre thei tur a ni.

        I kut pawh a kham ta deuh tih ah midang perh turin i ti anga, zung tur ang deuhin i tho chhuak ang. I kal pah chuan hmeltha-i te lam chu i pan anga, i va su lui deuh zeuh anga, na lutuk lo in. Hawi let pahin, “Sorry lutuks aw, a na em?” i ti anga, a la hmelhriat loh che avangin, a nui ringawt mai thei a, “Aih” pawh a lo ti ringawt thei. A rilru tak chuan a hrethiam chho tan ang, nang pawh chu zung tak tak lovin i va kal kual anga, i rawn let leh vat tur a ni. Tichuan, an lo la zai thup thup anga, hmeltha-i te hnung deuhah chuan i awm anga, i zai ve ang. Zawi zawiin hma lam i pan hret hret anga, a tawpah chuan i hriat miah loh laiin an bulah chuan i lo awm reng tawh ang! A mak lutuk, hei hi thil theih a ni!

        Tichuan, a mawi tawk an bulah i awm ta maw tih chuan, “A van lum em em,” i ti anga, “Nia a lum top,” a lo ti let ve ang. “Hawh, sawtilaiah chuan va ding mai mai ila, sikret te va zu ila, kan let leh dawn nia” i ti anga, i kalchhuah pui nghal tur a ni. Khawi emaw fal deuh hlekah in awm anga, hmeichhia chuan a la hmelhriat loh che avang chuan a tawng tha duh vak lovang. Sikret chu i phawrh anga, i offer ve ang, a lo duh maithei a, a lo duhlo maithei bawk. Engpawhnise, tawng loh reng zawng a dik love, “St. Paul’s ah i lut thin em?” han ti thawr phawt mai teh.

        A luh thin chuan phur tawkin, “Lut thin e…awii..i lut ve thin ami?” a ti anga, “Aw lut ve thin e,” i ti zui ang. “Brick te kha in thiar ve ngai em?” i ti anga, “Awiii…i ti duh e a, brick te, balu te, rawra te, lehkhabu te kan thiar nasa thei lutuk,” tih pahin a nui hawk hawk ang. “Class X eng batch nge in nih?” i ti thut anga, “2005..nang?” a tih chuan “2003-ah ania, in senior ka nih chu. Mahse ka chhuak vak ngai lo, class ah ka tawm reng zel” i ti zui anga. St. Pauls ah i lo lut thin tak tak anih chuan sawipui tur i hre teuh anga, i lut ngai lo anih erawh chuan, topic dangah i zuanpui vat dawn nia, sawi tur i haihchham hma in.

A luh ngai loh chuan, “Aih lut ngai lo… i lut thin ami?” a ti deuh sap ang a, “Lut ngai lo e, i luh duh hmel em a, ka ti mai mai,” tih pahin i nui seih ang. “Ka lut ve tep a, mahse ka peih leh lo a,” a ti zui ang. “Nia, keipawh an chapo thei lutuk a, ka peih lo alawm,” i ti ve zaih anga, in in nel chho viau ang. Ani pawhin a ngaihsan loh thu a lo sawi anga, St. Pauls in huat thu chuan, a ti in ngeih sawt ang che u. (Love, friendship, and respect do not unite a people as much as a common hatred of something. - Anton Chekov)

Titi na topic bul i tan tha bawk a, in titi dan a zirin a phone number dil tawp chi a nih leh nih loh chu i hrethiam tur a ni. Anih loh chuan inchhunga luh a duh tawh awm hun velah “phone bo” tactic kha i apply leh ngei chu a ngaih hmel. (A la hrelo tan part-I chhiar tur)

Classroom/Inkhawmna/YMA thiltihkhawm: Sum i neih vak loh chuan class te han kal taima la, inkhawm te han taima em em la, khawtlangah te pawh a mawi tawk chuan i inhmang ve tur a ni. Heng hi hahthlak ti suh, nula chhai thluk tum vanga kum 1 tal tawp piangthar der peih pawh an awm ania! “A hmel chu a chhe nang a, a taima reuh asin,” “Sum chu a nei vak lova, mahse a future chu a bright khawp mai,” tih neuh neuh in an sawi an sawi che anga, hmelthate-i thinlungah chuan thuk takin kua i lo hreuh hman tawh dawn a lo ni. Kan sawi tawh thin angin, hetiang classroom, inkhawmna, khawtlang thiltih angreng hi chu khawvel huap pawh a ni lem lo a, bel chhung sa i ti leh tawp teh ang.

        Classmate a nih chuan a assignment te han tihpui la, inkhawm naah chuan smart takin i kal anga, a hmuh tur ngeiin i thu thin tur a ni. Khawtlang tih tihkhawmnaah chuan a over chiah si lova fiamthu thiam deuh te nih der tur. Point a keng hnem!

Tawnsabawp: Heng hi chu i tawng hnem em em turah dah lo ila, i thiante zarah chuan i tawng ve zauh zauh maithei. I tawn ve chhunah chuan ‘man’ takin i awm thin tur a ni.

STEP 2 – Tichuan, a phone number chu i lo nei ta a

A number i neih chu i en i en thin dawn nia. A hma a kan sawi tawh ang khan hmanhmawh lutuk tur a ni lo. Ni li in A tlai a, a hun takah A thleng tho alawm le. A hun tawh vel ang a, i tih hnu ni 3 vel ah chuan i va text tur a ni. A lo bo viau ang. I nihna diktak kha han phawrh leh thuai mai teh le. A bak chu i chhiar tawh kha.

Hetihlai hian i thiante ho i huikhawm thiam hle tur a ni. I thiante nen khawi emaw ah picnic i rawt tur a ni, a chhan chu nangmah chuan i afford dawn loh avangin. Hun remchang, chawlh denchhen in emaw, engemaw hunpui denchhen ni thei sela, a fuh duh ber. Chumi in hun ruat a lo thlen hma chuan i lo kawm tlangnel hman tur a ni a, an inah vawi hnih khat tal chu i leng hman ngei tur a ni, i thiante nen.

        A music ngainat zawng te i zawt thin anga, a email i zawt ngei bawk dawn nia. A email hi facebook a in register nana a hman a lo ni ngei anga, facebook notification leh spam mail hlir deuh thaw in a khat thin ang. A hla duh deuh emaw, i classmate anih chuan assignment vel pawh email ah ka lo thawn mai ang, i ti anga. A lo hmulo thin ngei ang, a chhan chu i thawn hnu ah pawh notification a dawn hnem hman dawn em avang mai a ni.

        “Ka thil lo thawn che kha i hmu em?” i ti anga, “Hmulo reng reng,” a ti anga, “Facebook notification vel i dawn hnem em thin vang anih kha, a thar in email ka lo siamsak ang che nga, a password chu i thlak leh mai dawn nia, tah chuan ka rawn thawn ang che,” i ti ang. A email pangngai ah pawh a zawn dan chu i hre maithei, mahse hrilh kher tur a ni lo. Tichuan, email thar chu i siamsak anga, i siamsak zawh veleh i thawn zui nghal anga. I thawn zawh veleh i va call tur a ni, “I email chu ka siam tawh asin, gmail ah ania,” i ti anga, “hmelthatei@gmail.com ania, lo check nghal rawh, a dik leh dikloh,” i ti zui ang. “Ngawi rawh, lawks aw,” a ti anga, a computer te chu a on chawp anga, gmail a luh dan te chu a rawn zawt ang che, i hrilh zar zar tur a ni. “email ah khan hmelthatei@gmail.com kha i type anga, chuan password ah khan…” i ti anga, “Loks loks, ka la type hmanlo, engtin maw?” a ti anga, i hrilh nawn leh anga, a username kha. “Chuan password?” a rawn ti anga, fiah vak lovin, “iloveyou  a inzawm vekin” i ti anga, “Engtin maw?” a rawn ti anga, “iloveyou” i ti nawn leh sak ang! Pa viau lo maw? + Point

STEP 3 – In inbe ta a…

        Nia, phone ah chuan in inbe zeuh zeuh ta a, an ina i len dawn apiangin i thiante tu emaw ber emaw pakhat chauh lo pawh lenpui thin ang che. A chhan chu i thiante pawh i nel tir viau tur a ni, hei hian awmzia a la nei viau dawn tih i hre khiau tur a ni. Tawng zuah zuah zel lo la, bakah inthlahrun hmel deuh, zahzum hmel deuhin awm tur kan tih tawh kha. A cool a, a man bawk.

        Phone a i biak apiangin khum atangin mutchhuak hmel deuhin be thin ang che. “I mut a van chhuah hmel em em?” a tih a tih pawhin, mipa mutchhuak aw hi hmeichhia in a aia sexy a awm lo tih an hrechiang khawp asin. “I mut a chhuah hmel tawh e mai, mu tawh mai rawh,” a tih pawhin mu turin a la ui hle che a ni tih hria ang che, “Chhuak lo e, phone ah hian ka mut a chhuah hmel thei hrim hrim aniang, ka thiante pawhin an ti ziah,” te i ti deuh talh talh dawn nia.

STEP 4 – An ina len ringawt hi a tawk lo

        Tunah chuan an ina len mai bakah lenchhuah pui ah te i sawm tan tawh tur a ni. A hmasa berah chuan nangmah a lenchhuah pui hmasak ai chuan a hma a i thiante nena in lo plan tawh sa, picnic naah khan i sawm ve tur a ni! “Saturday ah ka thianpa te huanah kan picnic dawn a, chhas te hruai vek tur an tia,” i ti anga, “Tunge i hruai ve dawn a?” a lo ti anga, “Niaa…hruai tur pawh ka nei ve dawn lo a, kal loh mai te ka duh,” i ti anga, “I ho lutuk, chutiangin an ti ngai lo, i thiante tu emaw sawm la,” a rawn ti leh anga, “Sawm tur pawh ka hre lo, lo kal ve zawk daih la,” i ti anga, “I ti zahthlak e a, sawm tur chu i hre awm e mai,” a ti leh ang.

“Zahthlak loh e, ka thiante ho vek kha, kha in ina ka lo lenpui thin te ho mai mai kha alawm, Johna te, CF-a te, Zorina, Chda te vel kha, midang pawh i hriat vek tho kha,” i ti anga, “Tute?” a rawn ti leh anga, “Aww…Rsa te, OPa te vel, lo kal ve ngei ngei rawh aw,” i ti anga, “Haha, anih chu. Ka va hre leh hlawm si ve, aaaa, mahse a nuam awm lo e, lo kal ve ringawt chu,” a ti leh anga, “Enge nawm lohna tur? Lo sawm ve ngei ngei rawh an ti zawk alawm. Tui chen i thiam em? I thiam loh chuan ka zirtir ang che,” i ti anga. “Thiam lo rapthlak, ka hlau tlat a, hmanah pawh kan zir tawh a, ka thiam thei lo reng reng” a lo ti ang. “Ka zirtir dawn che alawm, ka zirtir che chuan i thiam hrim hrim ang,” i ti anga, “Nia, a hun te lo thleng phawt se..” a ti anga, hetia a tih tawh hi chuan AW a tihna a ni tih hria ang che.

STEP 5 – Date vawikhatna

        I thiante nena chhuak ho tur ni mah ula, date a ni tih pawm thlap ang che. I thiante zarah nuamsa takin i awm tir dawn a ni. A hun a lo thleng ta! Amah in sawm na lamah chuan a mipa rual te khan in va sawm mai ange, a tihchi loh ania, in thiante dang hmeichhia, a tlangnel tawh sa kha in sawm phawt anga, tichuan, an in ah in va sawm chauh dawn nia. Hmeichhia an tel ve a ni tih a chhungten an hriat khan a that bakah, amah pawh a tlangnel lehzual ang.

        In thiante hmeichhe dang nen chuan introduce vat vat anga, i inkawmngeih tir vat tur a ni. Tichuan, kalkawngah chuan fiamthu te in thawh bawrh bawrh anga, i bulah i thut tir chat dawn nia. “I thut dan kha a hrehawm em?” te i ti anga, “I zun te chhuak em?” i ti anga, i care em em mai tur a ni. A zun a chhuah apiangin in ding chat chat zel tur a ni. Tui a in duh pawhin a bottle a pe mai lovin a chhin i hawn sak thlap zel dawn nia, motor a chuan lai hian tui in hi intih buak palh emaw tih far deuh hi a awl em em a, a kut in a inhru anga. A bottle kenlai chu i laksak pahin a khabe velah emaw a kut vela tui la kai chu i hruk fai sak dawn nia. “Mi care thiam tak” an tih chu i ni ta ngei mai le!

        A hmun in thlen veleh amah chu coach deuh chawt ni si lo, mitmei ru reng si in i hmeichhe thiante bulah chuan i awm tir ang. Mipa ho chuan tui in cheng nghal deuh vek anga, a hmuh laiin tui chu i cheng tur a ni a, a rin ngam turin i cheng thiam a ni tih lantir la, ‘Mihur tuihleuh’ taksa dang pil veka mawng tih lan zeuh zeuh ang chi kha chu ti tel kher lo la. A hnuah hmeichhe ho pawh chu an rawn lut anga, i lo en reng anga. “Lo kal rawh, lo cheng ve rawh,” tih pahin a bulah chuan i hleuh phei anga, “A thuk lo laiah sawn lo lut rawh,” i ti anga, a rawn lut tur chu a ke a rawn dah lut hmasa anga, a hma zawnah i awm anga, i kut veilamin a kut ding lamah i vuan anga, i kut dinglamin a kawng ah. Tichuan, a rawn lut veleh i kuah titih der mai. Einch! Mahse thlah vat ang che..

        A hnung lam atangin a chang leh a zak ve ve ah i vuan anga, i kalpui anga, a chang leh i dar ah i vawn tir anga, i in zui tir bawk anga, a thuk lo lai zelah kalpui ang che. “Awii….ka hlau, a thuk laiah min kalpui suh aw..”  a ti deuh chhen anga, “Hawh, a thuk lo laiah hian ka zirtir ang che i ti anga,” a tihdan tur entirin i ti chhin vel dawn nia. “Lokal rawh le, hlau suh,” i ti anga, i kut in a dul leh a awm velah chuan i chawi dawn nia, mahse a fet lo thei ang berin aw….chuti lo chu a chhuak daih mai ang!

        A ning vat anga, a nin rual rualin i chhuah pui tur a ni. In thiante tuicheng en pahin eitur in pai te kha in ei pah mai mai anga, in titi vel dawn nia. In thiante chu i lo au vel anga, fiamthu te i lo thawh vak vak dawn nia. A bak chu, zirtir leh a ni mai, a hma ang bawk khan.

        A lo tlai deuh ta bawk a, haw lam te in lo hnaih ta a. “I chau em? I bag hi chu ka lo ak daih ang,” i ti anga, “Aih chau lo e, ngai lo, a rit lo lutuk” a tih leh a bag i laksak chu a in rual tur a ni. In haw lam pawhin i bulah i thut tir leh anga. A muthlu ngei ngei ang! A mutthluk lai hian i darah emaw i awm nghengin emaw a lo muthlu anga, i kuah pahin a kut ah i vawn sak dawn nia. A chang leh a ban te chu i chul heuh heuh thin dawn nia, thli thaw in a chhem vawh lutuk loh nan.

        Hmeichhia hi an in phal viau pawh hian chet vut vut loh tur. Bialpa tak tak tlak ah a ngai lo palh ang che. Mi insumthei, fel, mi care thiam, te hi an ngaisang daih zawk ania!

        An In in thlen hunah pawh an inchhung thlengin thlah fel thlap tur. Thingpui in tura a tih che u pawhin duh kher tawh loh tur, a chauh ve bakah, midang haw na tur a ti tlai palh ang, “Zanah kan inbe dawn nia,” tih pahin kal hmaks tur, a mumangah a hmu ngei ngei tawh ang che.

STEP 6 – Date vawihnihna

        Tunah chuan nitin zantin in inbe tawh a, chhuah pui ah i sawm ve tawh tur a ni. Date in set anga, in hun tiam thlen hma in i thiamthil fahrah te te hmang khan gift i siamsak tur a ni. Dawra mi thil to tak tak adidas kekawrte, reebok bra tih vel a ngai lo, i talent hmang khan sum seng vak lovin thil tha deuh i siamsak tur a ni. Example hrang hrang –

1.   Hla chi hrang hrang, ngaithla tura i duh ho, a indawta a ngaihthlak tura rem sa CD ah i write ang. A CD ah chu lightscribe hmangin a thlalak emaw a hming emaw i print tel ang.
2.   Kut themthiam mi i nih chuan In (house) lem tereuhte emaw, keychain emaw siamsak ang che, a hming ziak tel zel la.
3.   Hanky plain i lei anga, romantic takin thuziak emaw rose lem emaw, screen/rubber print in i tih tir ang.
4.   Hla i phuah sak thei.
5.   Thawnthu i ziahsak thei. (Hei hi tu emaw birthday ah hmanah ka ti tawh a, very effective)
6.   A dang a la tam mai, i thluak tha tak kha hmang tangkai ang che.

In hun tiam a lo thlen chuan inhmuhna hmun in sawi ah chuan i hruai anga. Lir i neih loh avangin ke a kal nuam i tih zia te, taksa tan pawha nitin kilometer 1 tal kal ngei ngei kan mamawh zia te i sawipui pah anga, i kalpui vel dawn nia. Bazar pui duh suh, pawisa i nei bawk si lo a, chu ai chuan khawi emaw kawng sir dawr ami chips leh cold drinks vel lei pui la, “Kalna tur tha deuh ka hria” i ti anga, khawi emaw hmun fal nuam deuh, view tha si ngaihtuah la, chutah chuan kalpui ang che.

Simple living, high thinking i lak thutak zia te i sawipui keuh keuh anga, hmun nuam i tih deuh ah chuan i kalpui dawn nia. Tichuan, a hmun in thlen hun chuan thutna spot tha deuh ngaihtuah nghal la, a rilru tak chuan nuam a ti lo maithei. A tlangnel theih nan, lung te i invawmthui siak pui anga, van nalh zia te, a romantic ve thei tur, cute bawk si ang chi hlir ngaituah chhuak ang che. Sek deuh tung, mahni vengah chuan keite pawh ni mahla, a hunah chuan cute deuha chet te a ngai thin ania.

In thil lei te chu in ei dun anga, tichuan, “Maimitchhing rawh le,” i ti anga, “Engatimaw?” “Lawks, maimitchhin rawh,” “Aa ka duh lo..,” “Please….mamitchhing la, chuan i hre mai ang.” A maimitchhin veleh a thil tur i kensak kha i phawrh anga, a hnung lamah i va dah daih dawn nia. “Meng rawh le,” i ti anga, hrilhhai hmel deuhin a rawn en ang che anga, “I hnung kha va en teh…” i tih pahin a hawi phei anga, chu veleh a bul hnaiah i va thu phei ang. “Awwii… Enge a? Awii….hei hi ka ta tur maw?” “I van ti lawmawm….ihhh….you make me feel soo…. I donno what to say…” te a ti bah nuaih mai ang. Khami i thil present i buatsaih dan te i sawi chho anga, i rilru zawng zawng i pek thu te, dawra thil lei ai chuan a hlu i tih zawk thu te i sawi anga, “This iss sooo sweet….” a ti ngawih ngawih mai ang, “Thankss….” tih pahin a rawn en leh che anga, i KISS ang! You the man!

Sawi tur a vang leh pharh mai ang! Mahse, sawi tur a van lai tak hian i phone hlui ve tak mai chu i phawrh anga, a message sweet i tih deuh i save thlap thlap ho kha i entir anga. “Heng i message ho hi ka chhiar nawn zing tawh lutuk, zan ka mut dawnah te hian ka chhiar ngei ngei” te i ti anga, tawng tur a la hre vak lo ang. “I phone ka lo en ve chhin,” i ti anga, a phone chu eng ang chi pawh nise, a specification kimchang hre ang deuhin diklo deuh mah nise i risk anga, “Hei hi Android hmang kha a ni tiraw?” te i ti chho anga, “Engmah ka hre ve lo,” a lo ti ang. A dang dang i zawt anga, a hriatloh thu hlirin a chhang ang che. A camera chu i on anga, a thla te chu i laksak anga, in pahnih te chuan thla i inlak dawn nia. “Nakinah facebook ah lo upload rawh aw,” i ti keuh dawn nia.

Titi fahrah te te i vawrh hnu reilote ah “Haw tawh ila,” a rawn ti anga, “Nia tiraw, a tlai hma in,” i ti anga. “Ka thlah ang che,” i ti zui nghal dawn nia. A hmanhmawh deuh tawh anga, hmanhmawh lo mahse, a hmanhmawh der ang.

An in thleng i thlah thlap anga, i chhuah leh pahin kiss kher tum tawh suh. I chhuah hnu minute 5 velah, “Miss you already…” tih te i thawn dawn nia. Hmeichhe pakhat chu bem em em lovin i lo NIH pui leh tan ta der mai. Kalkawngah i lawm lutuk kha kal fimkhur ang che, in tauh palh a awl ania.

STEP 8 – How to continue?

        A bak chu a tam thei ang berin i be tur a ni. I thiltih apiang i in report thlap thlap anga, i thlen chin i hrilh zel dawn nia. Hmeichhe bula hetiang tih hi thaibawih na a ni hranpa lo, duh ber te chan ai chuan thaibawih deuh pawh a pawi lo an ti alawm. Thu romantic leh sweet deuh deuh, internet lama mi nilo, nangma phuah chhuah ngei thawn thin la, chu chu a lo ngaisang em em thin ang.

STEP 9 – Hriat ngei ngei tur

1.   Pawisa i neih loh thin avangin restaurant ah emaw i chawlh pui lo tur tihna a ni lo, i inkhawl anga, a khat mawi tawk chuan i chawlhpui thin tur a ni.
2.   Sum i neih deuh chang chuan thil mawihnai ve tak te pawh leisak ve thin ang che.
3.   A bulah chuan sum i neih loh thu i sawi reng tur a ni lo.
4.   Balance ka nei lo te i ti mai mai ange, hmeichhia hian a mipa zawk call hi an expect thin a ni tih hria ang che.
5.   Khawiah emaw treat a tum che in, i pawisa neih loh vanga a tih emaw ah ngai suh, a duh let ve che tih hre zawk rawh.
6.   A tira i care ang khan a tawp thleng thak i care thiam tur a ni.
7.   Gift a pek che in, pe let ve ngei ngei ang che. A pek loh che pawhin pe thin rawh.
8.   Mamawhna che a neih in 24x7 Customer Care ah i duty tur a ni.


CONCLUSION

        He i project ropui tak hi a lo hlawhtlin tak avang hian ngaihtha taka awm hle hle tur a ni lo. I tih tur hria la, a tih tur ah inrawlh phet tum suh ang che. A keh thei a ni tih hria la, a thinlungah chuan Fragile label a inbel a ni tih hria ang che. Tin, i lo hlawhtling ta kher lo anih pawhin i ti tlut tlut mai tur a ni. “Hmeichhia leh City Bus te chu a dang a rawn tlan zel alawm” an tih hi chu hriat pawh hre duh suh, City Bus lo tlan hmasa na na na chuan traffic jam karah pawh i duhna hmun ah a thlen pui hma zawk ngei ang che. Good Luck!

Thursday, March 1, 2012

K.S. Encounter

        KS tih tawngkam hi chu ka’n hriatna a rei tawh theuhin a rinawm. A lampum dik tak hria kan awm angem le tiin zawhna ka in zawt mai mai thin a, uangthuanga kan sawi mai mai bak hi lampum a nei lem lo emaw ni chu ka ti. Nge ka lo bengvar lo lutuk zawk?

        He khawvela thil awm ve tlat ni si, a tih reh tuma mi tam takin an buaipui, thenkhat tan nawm chenna, thenkhat tan tenawm, thenkhat tan kan chhungte, thenkhat tan kan thiante, vai mistiri te’n an hlawh an hman hnem na ber, thenkhat in an hmangaih em em, khaw te ber atanga ram changkang ber thlenga zan khawhar luahlum tu te nen hian kan in tawn dan ka’n hrilh ang che u.

Tawn vawikhatna

        Delhi kan awm tirh deuh lai kha (ti ve khanglang ziah ila) a ni a, ni khat chu ka roommate Michael-a nen chuan tlai lamah Sarojini Market-ah kan bazar a. Eng eng emaw mamawh chi hrang hrang kan lam kual a, rin aiin kan rei phian mai. Khawlum nen chauh hnep hnu-ah auto la turin kan inzui phei hnak hnak a. Auto ho lah chu kan veng lamah an kal tha duh der lo mai a, a kal duh chhun te lah khan a fare kha an han ti to em em lehnghal a. Chauh deuh nen thin a rim tun tawh mai a. A tawp a tawpah, bazar khar hun dawn tawh lamah pakhat kal duh kan hmu ta hlauh a, rang lutuk in kan chuang lut a, kan titi zui nghal bawrh bawrh a.

        Kan veng Gautam Nagar lut tur hian Uday Park leh Uday Park Market kal tlang a ngai a, kan In thleng tur hian Father Agnel School bulah gate a awm a, chu chu main road a awm mai a ni. Gate hi dar 10 ah chuan an khar thin a, Gate thleng hi auto an tlan thei a, a bak chu ke a kal leh deuh a ngai thin a, chumi lo ah chuan galley tereuhte Masjid Moth lamah a tlan luh theih bawk a, hemi kawngah hi chuan kan In kawt thleng a chuan theih a ni.
       
        Gate an khar tawh kan rin avangin galley te lamah chuan kan tlan luh tir a, thui pawh kan tlan hman lo, hmeichhe pakhat hian auto chu a lo phar a. Auto pu chuan passenger a nei tih hriattir nan a lu thing mut mut pahin a tlan pel mai a. Chuveleh Maia nen chuan, “In kan hnaih tawh tho a, auto a vang ropui sia, a tlai tawh sia, chhuk mai ila, chuan tir mai ang,” tiin kan inrawn a, auto pawh chu ding turin kan ti nghal a. Fare pe tura kan in phawrh buai vel lai chuan, auto lo phar tu nula chu a rawn phei a, auto pu chu a be mai dawn emaw tih laiin keimahni chu min rawn be ta. Nula lianpui mai, ngo phuk mai hi a ni a, a inhnawih tai hlur lehnghal a. Rilru tak chuan kan tih nghal khawp mai.

        Subject bika vaitawng thiam kan nih avangin enge a sawi phei chu kan hre lem lo a. Auto pu lah chu a thut dan a rawn her rem sauh sauh a, a rawn nui hui bawk a. Kan hrethiam lo ngang mai. Fare chu kan han pe thawr ringawt a, rilru a hrilh hai tak chung chuan kan chhuk ta a. Kan nula-i lah chuan min be zui zel a, kan vaitawng thiam chhun chhun thawhkhawmin auto a chuang mai tur chuan kan han ti a. Kalsawn kan tum chuan min zui ta zel a. Auto lah kha kan bul hnai maiah kan chuan leh duh takin a rawn tlan zel bawk a.

        “Hawh, ATM ah kal tho ka ngai bawk a, Uday Park Market lamah phei daih ang, mi an awm nual a, min um zui peih lo ang,” tiin Maia chu ka hrilh a, chak tawkin kan kal hnawk hnawk a. Thui kan kal hma in, auto ah chuan a chuang a, min rawn umzui ta zel a, kan sira rawn tlan pah chuan vaitawng bawk chuan eng eng emaw hi a rawn sawi leh chiam a.

        Chhan dan vak thiam tawh hek lo, “Naii….Naiii” tih pahin kan lu kan thing phei nawk nawk reng a. A tawpah chuan a tawng chu kan hrethiam ngang lo a ni tih a hrethiam ta a ni ang, a saptawng thiam ang ang chuan min rawn be ta. Chutah chuan alawm, enge a sawi tih kan hriat ve chiah chu.

        “You like faking? Ha? “

        “Drinking, saking, faking? Only 200 rupees for you two”

        “C’mon….faking?”

        A rawn ti ta tulh tulh mai a, Uday Park Market chu kan thleng der tawh a, vaiho lah chuan min nuih tut tut hlawm a. Maia nen chuan kan in en a, “Khai aa….hitlo vee” tih pahin kan in nuih deuh thaw a. Ni e, a zahthlak ve bawk a ni, hetilai vaiho hi nitina kan hmuh leh biak thin, kan hminga min au thei deuh vek a nih avangin a zahthlak lehzual. ATM booth ah chuan a rang thei ang berin kan inzui lut nghal a, kan nula-i lah khan amah hire na tur pawisa kan la chhuak dawn emaw a ti ni ngei tur a ni, pawnah chuan auto nen khan an la ding tlat mai a. A khat tawkin kan va en zauh zauh a, a ding tlat mai si a. A kal hma chuan chhuak lo tura infuih chungin ATM chhungah chuan kan ding ta tlat a. Rei ngial kan awm hnu chuan an kal ve ta mai a. Rilru pawh a thawveng huai mai.

        In kan thlen hnu chuan kan thiltawn chu kan sawi zui dun char char a. Kan ngaihtuah chhuah tak chu, kha nula khan auto a chuan duh vanga phar ni lovin customer a lo zawng ve kha a lo ni a, a piah maia kan ding zui ta chu, customer ka hmu ta ngei e tiin min lo pan vat kha a lo ni a. Kan zak bawk si, nuih za bawk si. A tawpah Maia chuan, “Sef, a lian tha sia, a ngo phian bawk sia, cheng sawmnga vel pe ila, a hnute kha en kan lo dil lo a ni,” a ti a, kan nui dun bawk bawk a.

Tawn vawihnihna

        Thianpa Zorina hi a chhungten tui pump khawl an rawn chah a, “Nang tawng thiam zawkah min kalpui rawh aw,” a ti a, ni e, Zorina ai kha chuan ka thiam deuh alawm. Pallika a ka bazar pui te khan nuam a ti cher cher em! Tichuan, tui pump khawl lei tur chuan kan inzui chhuak ta a.

        Thil dang leina tur hi chu a hriat mai zel a, tui pump khawl ber kher chu a tlawm na hmun tur ka hre lo hle mai a, “Thianpa, khawi hmunah nge kan lei dawn a?” ka ti a, ani lah chuan, “North lamah, a tlawmna address min rawn hrilh alawm,” a ti a. Tichuan, auto a kan kal fe hnuah, metro ah kan chuang leh a, metro a kan chhuk hnuah cycle rickshaw kan la leh a. Kan kal duhna address chu Zorina chuan a phone ami a han hmuh a, ngai teh Thiani te Lane ah a ni ta tlat mai.

        “Khai a, hetilai vel hi mizo dang an tam ve si a, thiani te dawr tur emaw te min ti ange aw, va zahthlak ve, lukhum ka lo khum lo a ni,” ti pahin Zorina chu ka han melh a, dik tak chuan hetilaia cycle ho hi thutna chiah awm chi, a chung khuhna awmlo kha a ni a, kan langsar em em mai lehnghal a. Haw san leh mai tak kha ka nap a, mahse a chi tawh si lo. Kan chuang phei dun ta voh voh mai a.

        Hlauh ang ngei ngeiin a khat tawkin min rawn be ta sup sup mai a, cycle pawhin a kal chak theih loh. “In duh ami?”, “Hetah lo kal rawh u”, “Engzah man chi nge in duh?” an rawn ti ta sup sup mai a.  A thenin kan kawr ah te chuan an rawn pawt bawk a, kan chhangchhe ngei mai. Cycle khalhtupa chu kal chak deuh turin kan han tur thin a, tihngaihna vak a hre bik si lo.

        Tui pump kan leina tur dawr zawn chu kan thleng a, kan chhuk vat a, lane lehlam a awm anih avangin cycle a kal kual kher tawh lovin ke in kan phei nghal vat vat a. Tui pump lah chu chi hrang hrang a lo tam si, kan rei leh ta phian a. Dawr pakhat atang chhuak hlek ila, a ngai te bawkin an rawn inzuar leh sup sup zel bawk si. Hetiang em em a kan luck pawh hi ka la hre ngai lo e.

        Thim thet thet ah chuan pakhat chu kan lei ta a. Cycle bawk la in kan haw ta vang vang a, kal lam ai khan a zia tawh a, kal pah chuan mi thenkhat chuan Rs. 200 man pakhat aia Rs. 50 man pali an duh zawk thu fiamthu te thawh pahin kan nui phei leh ta bawk bawk a.

Tawn vawithumna

        Nikum kum tawp lam khan zan khat chu ka thianpa in a pu damlo serious angreng tak, Durtlang Hospital a awm chu menpui turin min rawn sawm a. E chutiang te chu ka’n insiam ange tiin tlai tawh angreng takah chuan kan chhuak a. Mi an awm pheuh pheuh a, hmeichhia kan hmu hnem hle a. Call girl leh KS tih neuh neuh hi Mizoramah hian an awm ve teuh tawh an ti si a, kan ngaihdan hrang hrang te sawi pahin kan titi phei bawrh bawrh a.

        Dawrpui pheia kan tlan lai chuan hla deuh taka hmeichhe pahnih rawn kal phei hi kan hmu a. Uan chhuah ve reng reng teh ang tiin an zawn kan thlen hunah ruih hmel deuhin leng turin sawm ila kan ti a. Rawn kal an tum pawhin khawiah emaw kan drop daih dawn nia, kan ti a. An zawn kan thlen chuan, kei chuan, “Hawh u, leng ila…?” ka ti a, an ding chawt a, tleirawl te pahnih hi an ni a, min en reng a, “Kan ride dawn nia..” te ka’n ti leh ringawt a. Chutah an rawn lut ve mai dawn emaw tih nak alaiin an kal ta thut a.. “Pawisa in nei awm lo e mai aa….” tiin an nui phei dun uar uar a. Thianpa chuan, “Sala…a va na deuh ve” ti chungin kan nui phei dun ve tiah tiah bawk a.

Sawi belhna

        Tuna ka sawi chin bak pawh khi sawi tur chu a awm nual ang, hmun dang atanga mikhual kan neih tuma nula dinner ei pui tur a duh ve si a, kan zawn sak dan, kan tum dan hrang hrang leh kan hlawhchham dan te, thiante bday party a thian hlui pakhat nena pawna kan titi bawrh bawrh laia call girl tia an sawi pahnih insual kan thelh thu te (an chhelo phian lehnghal a), veng hla deuh pakhata kan len tuma kan haw lehlamin taxi chang lai, haw na tur nei loa insawi kan thianten an phurh KS lo ni ta si te, Vai pahnih leh KS indawr lai zan dar 8 vela ka hmuh tuma a hmeichhia chu eng ang hmel nge tih chan chhuah tuma a thim chin atanga an lo chhuah ka lo chan reng laia ka hmel a lo chhinchhiah hman hle a, a hnu thlenga chu nu ka hmuh a min en hu hu zel thin te. Ziah vak vak chi pawh a ni lo, min lo hmu diklo palh ange. Hehe

Nupa khawngaihthlak

        Hmanni chu hetiang lampang thupui hmang hian kan titi bawrh bawrh a, chuta ka thil hriat pakhat chuan min khawih hle mai.

“Nu pakhat, pasal nei lai inzuar thin a awm a, chu nu chu a pasal hriat loh a ti a ni lo, a pasal chuan nau paw chungin a zui thin! An nu leh a dawrtute in ninja vel laiin an pa chuan an naute chu a lo awm thin an ti.  An pa chu a rilru nat leh nat loh thu an zawhin, a tirah chuan a rilru a nat thin zia leh zan pawh a mut theih ngailoh thu a sawi a. He eizawnna kawng rapthlak tak mai an zawhna chhan chu, an retheih lutuk vang leh eizawnna kawng dang an dap apiang an hlawhchham zel vang niin an sawi a. Pathian hnenah tawngtaia dil thlap chungin kan eizawnna hi kan ti mai a ni tiin an pa hian a sawi,” tiin kan thian pakhat chuan a rawn sawi a.

Kan thiana pawh chu midang hnen atanga a hriat lehchhawn a ni a, a hrilhtu lah khan khami te nupa kha an phone number emaw an veng emaw zawhna chang reng reng a lo hriat loh thu leh, hmuh tuma a zawn leh pawhin a hmuh tawh loh thu bak sawi tur a hre tawh si lo.

        He mite nupa hi an awmna chin hria emaw, an mahni hria emaw chuan inhriattir theih ni sela, tanpui duhtu an awm ania!